पश्चिम नेपालका धेरै ठाउँमा वर्षा, काठमाडाैँमा पनि वर्षाकाे सम्भावना

काठमाडाैँ । पश्चिमी वायु सक्रिय हुँदा सुदूरपश्चिम र कर्णाली प्रदेशमा गएरातिदेखि वर्षा भइरहेको छ । यी प्रदेशका धेरै ठाउँमा मेघ गर्जन र चट्याङसहित हल्कादेखि मध्यम वर्षा भइरहेको जल तथा मौसम पूर्वानुमान महाशाखाले जनाएको छ । बाँकी पहाडी भू–भागका थोरै ठाउँमा पनि हल्का वर्षा भइरहेको छ ।

पछिल्लो १२ घण्टामा बैतडीमा सबैभन्दा धेरै २० दशमलव ६ मिलिमिटर वर्षा मापन भएको छ । यस्तै बाजुरा, डोटी, डडेलधुरालगायतका जिल्लामा पनि वर्षा भएको छ ।

मौसम पूर्वानुमान महाशाखाकाका अनुसार काठमाडाैँ उपत्यकासहित देशभर अहिले बादल लागेको छ । दिउँसो पछि काठमाडाैँमा पनि पानी पर्ने सम्भावना छ । तर पश्चिममा भन्दा कम पानी पर्ने महाशाखाले जनाएकाे छ ।

महाशाखाका अनुसार भारतको जम्मू काश्मीर, हिमाञ्चल हुँदै नेपाल भित्रिएको मौसमी प्रणाली आज दिउँसोसम्म काठमाडाैँ आइपुग्ने तर पश्चिमको तुलनामा कमजोर रहने अनुमान छ ।

यसले मधेशबाहेकका अरु ठाउँमा प्रभाव परे पनि पूर्वमा सामान्य मात्र असर पर्ने मौसमविदले बताएका छन् ।

मौसमविदका अनुसार भोलि आजभन्दा कम पानी पर्नेछ । भोलि बेलुकादेखि धेरै ठाउँको मौसम क्रमिक सुधार हुँदै जाने महाशाखाले जनाएको छ ।